आमदार विलास भुमरे यांच्या हस्ते लाभार्थ्यांना धनादेश प्रदान
पैठण | प्रतिनिधी
शेतकरी कुटुंबांवर आलेल्या संकटाच्या काळात त्यांना आर्थिक पाठबळ देण्याच्या दृष्टीने शासनाकडून मदतीचा हात पुढे करण्यात आला आहे. पैठण तालुक्यातील आठ आत्महत्याग्रस्त शेतकरी कुटुंबांना प्रत्येकी एक लाख रुपये याप्रमाणे एकूण आठ लाख रुपयांची मदत वितरित करण्यात आली. आमदार विलास भुमरे यांच्या हस्ते संबंधित कुटुंबांच्या प्रतिनिधींना मदतीचे धनादेश सुपूर्द करण्यात आले.
पैठण येथे झालेल्या या वितरण कार्यक्रमात लाभार्थी कुटुंबीयांना मदतीचे धनादेश देण्यात आले. आर्थिक संकटामुळे अडचणीत आलेल्या कुटुंबांना या मदतीच्या माध्यमातून काही प्रमाणात आधार मिळणार आहे. शासनाने मंजूर केलेली मदत लाभार्थ्यांपर्यंत पोहोचविण्यासाठी महसूल प्रशासनाकडून आवश्यक कार्यवाही करण्यात आली.
मदत मिळालेल्या कुटुंबांमध्ये शंकुतला मधुकर चव्हाण, गजानन सुदाम शिंदे, मीर सतीश जाधव, शीतल राजू धनवडे, कविता श्रीपाद महापुरे, मंगल रोहिदास तरटे, अर्चना बंडू आगळे आणि विष्णू करकू घोरपडे यांचा समावेश आहे.
यावेळी आमदार विलास भुमरे यांनी शेतकरी कुटुंबांच्या अडचणी समजून घेत शासनाच्या विविध मदत योजनांचा लाभ गरजूंपर्यंत पोहोचविण्याची गरज व्यक्त केली. नैसर्गिक संकटे आणि आर्थिक अडचणींमुळे कुटुंबांवर कठीण परिस्थिती निर्माण होते. अशा वेळी त्यांना शासनाच्या मदतीसोबत समाजाकडूनही आधार मिळणे आवश्यक आहे. या आर्थिक मदतीचा उपयोग कुटुंबांना पुन्हा उभे राहण्यासाठी होईल, अशी अपेक्षा त्यांनी व्यक्त केली.
कार्यक्रमास तहसीलदार ज्योती पवार, नायब तहसीलदार सतीश पेंडणे, अमरसाहेब निर्मळ, भूषण कावसनकर यांच्यासह महसूल विभागातील अधिकारी, कर्मचारी आणि नागरिक उपस्थित होते. यावेळी सतीश अंभोरे, अनिकेत धारकर, अनिल हजारे, शिवाजी तांबे आदींचीही उपस्थिती होती.
