लोणार/प्रा लुकमान कुरैशी
लोणार तालुक्यातील वझर आघाव गावातील रामदास सरकटे हा पत्नी च्या अनैतिक संबंधात अडथळा ठरू लागला.या बाबीमुळेच पत्नी पतीला कायमचे संपवण्यासाठी प्रियकर आणि पोटच्या अल्पवयीन मुलाच्या मदतीने कट शिजवला.एका शेतात आधी दोराच्या साह्याने गळफास देऊन नंतर डोक्यात दगड घालून पतीची हत्या करण्यात आली.नंतर मृतदेह विहिरीत फेकून देण्यात आला. ही खळबळजनक घटना भूमराळा येथे उघडकीस आली.बिबी पोलीस ठाण्याच्या हद्दीतील भुमराळा शिवारात जनाबाई प्रकाश चव्हाण यांच्या शेतातील विहिरीत ९ जून रोजी रात्री ८ वाजता रामदास त्र्यंबक सरकटे याचा मृतदेह आढळून आला.या प्रकरणी बिबी पोलिसांनी आकस्मिक मृत्यूची नोंद करून तपास सुरू केला.ठाणेदार एल. डी. तावरे यांनी तपासचक्रे गतीने फिरवली. चाणाक्षबुद्धीने अवघ्या १२ तासांतच खुनामागील सूत्रधारांचा बिबी पोलीस स्टेशन चे ठाणेदार एल.टी. तावरे व त्यांच्या टिम यांनी पर्दाफाश केला.घडविलेल्या हत्याकांडामागे पत्नी,अल्पवयीन मुलगा आणि पत्नीचा प्रियकर असल्याचे निष्पन्न झाले.पोलीस उपनिरीक्षक गोपाल राठोड,पोहेकॉ कलीम देशमुख,नाईक पोलीस शिपाई अरुण सानप,अर्जुन सांगळे व नितीन मापारी यांनी तपासकार्यासाठी मदत केली.
ज्ञानदेव रामप्रसाद आघाव (३४) हा या हत्येतील मुख्य सूत्रधार असून,तो मृताच्या पत्नीचा प्रियकर आहे. ज्ञानेश्वरची ४२ वर्षीय प्रेयसी तथा मृताची पत्नी आणि तिच्या अल्पवयीन मुलाने हे कृत्य केले.गुन्हा केला म्हणून पोलीस दप्तरी विधि संघर्षग्रस्त बालक म्हणून १५ वर्षीय बालकाची नोंद करण्यात आली आहे.याप्रकरणी भा.दं.वि. कलम ३०२,१२० ब, ३४ अन्वये गुन्हे दाखल करण्यात आले.
पोलीस अधीक्षक अरविंद चावरिया,अपर पोलीस अधीक्षक श्रवण दत्त व उपविभागीय पोलीस अधिकारी विलास यामावार यांच्या मार्गदर्शनाखाली अवघ्या १२ तासांतच हा गुन्हा उघडकीस आणण्यात बीबी पोलिसांना यश आले. यापूर्वीही भुमराळा शिवारातील खुनाचा गुन्हा बीबी पोलिसांनी बारा तासांत उघडकीस आणला होता.
पोलीस भुमराळा गावात तपासाकरिता गेले असता ग्रामस्थांच्या चर्चेवरून त्यांना दिशा मिळाली.आरोपी ज्ञानेश्वर आघाव व मृताच्या पत्नीचे अनैतिक संबंध असल्याची माहिती समोर आली.तसेच मृत व आरोपी पत्नीत वारंवार वाद,भांडण व्हायचे,अशी माहिती समजल्यानंतर त्यामागील मूळ शोधण्यात पोलीस यशस्वी ठरले.
