बुलडाणा / अतुल महाळनकर
अलिकडे सर्वत्र लग्नसराई सुरू आहे. कडक उन्हात लग्नाचे बार उडत असून, भर उन्हातान्हात घामाघूम झालेल्या पाहुणे मंडळींना ताटकळत ठेवून, उशिरा लग्न लावणे ही फॅशनच झाली आहे. नवरीच्या घरी वरात उशिरा पोहोचते. त्यानंतर डीजेच्या तालावर अनेकजण तासनतास नाचत राहतात. त्यामुळे उशिरा लागत असलेल्या लग्नाबाबत सर्वच स्तरात नाराजी दिसुन येत आहे. जर वेळेवर लग्न लागत नसतील तर मुहूर्त पाहायचा तरी कशाला असा प्रश्न अनेकजण उपस्थित करीत आहेत. काही सामाजिक संघटनांकडून अशा लग्नांवर बहिष्कार टाकण्यासाठी दबाव वाढत आहे.
याबाबत सविस्तर असे की, सकाळी १०:३० वाजेचे लग्न दुपारी ४ वाजेपर्यंतही लागत नाही त्याचवेळी सायंकाळी साडेसहाचे लग्न नऊ ते दहा वाजता लागते. सात वाजताच्या लग्नालाही वराती ताटकळत राहतात. * त्यामुळे लग्न मुहूर्त काढायचा तरी कशासाठी असा प्रश्न काही संतप्त वऱ्हाडी मंडळीकडून उपस्थित केला जात आहे. उन्हाची तीव्रता जास्त असतानाही दुपारचे लग्न वेळेवर लावण्यासाठी वधू अथवा वर पक्षांकडून कोणतीही काळजी घेतली जात नाही. काही लग्नस्थळी लग्न लागण्याच्या मुहूर्तावर चक्क नवरदेवाची वरात पोहोचते. त्यानंतर नवरदेवाचे मित्र मंडळी आणि नातेवाईक नाचण्यात मग्न होतात. अशावेळी वऱ्हाडी मंडळीची चांगलीच कोंडी होते. सद्द्यास्थितीत सकाळी नऊ वाजेपासूनच उन्हाची दाहकता जाणवू लागते. सूर्य आग ओकू लागतो. पारा ४० ते ४३ अंशांच्या दरम्यान असतो. सकाळचे लग्न दुपारी व दुपारचे लग्न सांध्यकाळी आणि संध्याकाळचे लग्न रात्री उशिराने लागतात. त्यामुळे अनेकांना वऱ्हाडींच्या भावनांशी काही देणे घेणे नसल्याचेच दिसून येते.
वेळेचे व्यवस्थित नियोजन केले तर तर लग्नाला होणारा विलंब टाळता येऊ शकतो. मात्र, अनेक लग्नस्थळी वधू आणि वर पित्यांना या गोष्टीचे कोणतेही सोयरसूतक नसल्याचेही दिसून येते.. त्यामुळे उन्हाळ्याच्या दिवसांतही लग्न उशिराने लागतात
-सतिष पंचादने दे.राजा
काही लग्नात नवरदेव तर काही ठिकाणी नवरदेवाचे वडील आणि आप्तेष्ठ लग्नात नाचून विलंब करतात. त्यामुळे मुहूर्त न काढताच लग्न करावे.
सुरेश महामूने, अंभोडा जि.बुलडाणा
