दिल्ली
महाराष्ट्रातील राजकीय संकटावरील सर्वाच्च न्यायालयातील सुनावणीपूर्वी शिवसेना बंडखोर नेते तथा सध्या राज्याचे मुख्यमंत्री एकनाथ शिंदे यांनी एक नवी खेळी खेळली आहे. शिंदेंनी शिवसेनेवर दावा ठोकत १२ खासदारांची लोकसभेच्या सभापतींपुढे परेड केली आहे. त्यांनी शिवसेनेच्या १९ पैकी १८ खासदारांचा आपल्याला पाठिंबा असल्याचा दावा केला आहे.मुख्यमंत्री शिंदे यांच्या या खेळीमुळे शिवसेना प्रमुख उद्धव ठाकरे यांना हा धक्का असल्याचे मत राजकीय वर्तुळात व्यक्त केले जात आहे.
दुसरीकडे, मुंबईत उद्धव ठाकरे यांनी बैठक बोलावली आहे. या बैठकीत पक्षाच्या उच्चपदस्थ पदाधिकाऱ्यांना बोलावण्यात आले आहे. तसेच महापालिकेच्या सभापतींनाही या बैठकीत सहभागी होण्याची सूचना करण्यात आली आहे. आमदारांच्या बंडखोरीमुळे उद्धव यांनी गत 29 जून रोजी महाराष्ट्राच्या मुख्यमंत्रीपदाचा राजीनामा दिला होता.
तत्पूर्वी, मुख्यमंत्री एकनाथ शिंदे मंगळवारी सकाळीच दिल्लीत पोहोचले आहेत. राजधानीत पोहोचतताच त्यांनी गृहमंत्री अमित शहा यांची भेट घेतली. त्यामुळे महाराष्ट्राच्या राजकारण आणखी मोठ्या उलथापालथ होण्याची शक्यता वर्तविली जात आहे.शिंदे गटाने सोमवारी मुंबईत झालेल्या बैठकीत शिवसेनेची राष्ट्रीय कार्यकारिणी बरखास्त केली. त्यानंतर मुख्यमंत्री एकनाथ शिंदे यांचा आजचा दिल्ली दौरा अतिशय महत्त्वाचा ठरणार आहे.
१२ खासदार पंतप्रधानांची भेट घेण्याची शक्यता ?
शिवसेनेच्या १९ पैकी १२ खासदारांनी शिंदे यांच्याशी सहमत करून लोकसभेत वेगळा गट स्थापन करण्याचा निर्णय घेतला आहे. वेगळा गट स्थापन करू पाहणाऱ्या १२ खासदारांना केंद्राच्या वतीने वाय प्लस सुरक्षा प्रदान केली आहे. सदरील १२ खासदारही मुख्यमंत्री एकनाथ शिंदे यांच्या समवेत पंतप्रधानांचीही भेट घेऊ शकतात.
