बदनापूर
आठ वर्षीय मुलाने गच्चीवर वाळू टाकल्याच्या कारणावरून एका साठ वर्षीय वृद्धास तिघांनी तूझ्या नातवाने वाळू का फेकली असे म्हणत बेदम मारहाण केल्याने वृद्धाचा मृत्यू झाला असून एका आरोपीस अटक करण्यात आली आहे. मधुकर उमाजी पोपळघाट असे खून झालेल्या वृद्धाचे नाव आहे.
बदनापूर तालुक्यातील ढासला येथील मधुकर उमाजी पोपळघाट वय 60 वर्ष घरी गच्चीवर झोपण्यासाठी गेले असतांना 30 मे रोजी रात्री 9 : 15 वाजेच्या सुमारास सुधाकर उमाजी पोपळघाट, मनोज सुधाकर पोपळघाट, योगेश सुधाकर पोपळघाट हे त्या ठिकाणी आले व म्हणाले की तुझ्या नातवाने आमच्या गच्चीवर वाळू का फेकली असे म्हणत शिवीगाळ करून लाथाबुक्क्याने मारहाण करून खाली पाडून जीवे मारले.
सदरील घटना घडल्यानंतर मयत वृद्धाचा मुलगा बाळू मधुकर पोपळघाट यांनी बदनापूर पोलीस ठाणे गाठून सविस्तर घटना सांगितली असता पोलीस निरीक्षक शिवाजी बन्टेवाड यांनी तात्काळ फिर्याद दाखल करून घेण्याचे आदेश ठाणे अंमलदर क्लानी यांना दिले असता सदर फिर्यादीवरून आरोपी विरुद्ध पोलिसात खुणाचा गुन्हा 31 मे रोजी दुपारी दाखल करण्यात आला, सदर आरोपी ढासला येथील आहेत.
गुन्हा दाखल झाल्यानंतर पोलीस अधीक्षक तुषार दोशी यांच्या आदेशाने उपविभागीय पोलीस अधिकारी नीरज राजगुरू यांनी घटनास्थळी भेट देऊन पोलिसांना विविध सूचना दिल्या असता पोलीस निरीक्षक शिवाजी बन्टेवाड यांनी सापडा रचून सुधाकर उमाजी पोपळघाट यांस अटक केली आहे.
